佔領行動快將一周年，有傳警方及律政司好快就會正式檢控佔中三子等佔領搞手。三子之一的港大法律學院副教授戴耀廷，近日就頻頻接受傳媒訪問，揚言如果自己被定罪，港大又因此要處分佢甚至將佢炒魷，可能會繼副校長任命後，掀起另一輪爭議同風波，變相威脅校方唔可以炒佢！講到咁大，唔通佢都聞到(火羅)味自己將會落鑊，擔心因而失去教席冇糧出？
戴耀廷又話，港大點樣處理佢嘅教席問題，視乎校方如何看待「公民抗命」。記得佢喺佔領行動爆發前講過，將來被控時既唔會抗辯，亦唔會請律師，會欣然接受「公民抗命」帶來嘅後果。但事實係佢喺早前嘅佔領索償案中大玩法律耍走申索人，依家又講到即使法庭判佢有罪，大學都唔炒得佢，點睇都唔似有承擔責任之意。佢又提到，自己唔擅長做街頭戰士，會退居幕後做民主論述工作喎。咁即係靠「吹水」，精人出口，笨人出手囉！