政情：未做局長 楊偉雄先帶團訪京
盛傳將會出任創新及科技局局長嘅行政長官創新及科技顧問楊偉雄，將會以榮譽團長身份，聯同擔任團長嘅香港特區政府資訊科技總監楊德斌，帶住一班創新及科技界嘅人士，今日啟程到北京訪問。楊偉雄仍未出任創新及科技局局長，但係就帶團去北京，而呢個團嘅對口單位，更加有工業和信息化部、科投部、港澳辦等政府部門接見，加上隨團有大量本港創科界人士，猶如一個官式訪問團，可以話係於禮不合。
創科界交流 飛起莫乃光
一向對記者好慎言嘅楊偉雄，亦突然喺記者會上暢所欲言，佢話冇放到暑假，至今已經同超過四十個議員單對單討論創科局，希望幫議員了解多啲，又話大家都可以睇到部分議員態度有變喎。至於十月後拉布係咪冇拉得咁勁，佢就話由議員決定，但佢認為拉布不合民主，係多數服從少數，希望拉布嘅人諗清楚，為香港向前看。
至於呢個團冇邀請立法會資訊科技界議員莫乃光，副團長楊全盛話今次邀請咗五、六十個團體，主要係創新及科技委員會成員、業界從業員同業界唔同會嘅「會頭」，冇特別邀請議員喎。