中環出更：酒會快閃 貪曾狼狽走後門
律政司今年六月底講過，會在三個月內決定是否檢控「貪曾」前特首曾蔭權爵士。貪曾尋晚出席一個酒會時，在台上先後與多名特區高官及工商界人士祝酒碰杯，但唯獨不敢行近律政司司長袁國強，明顯心裏有鬼。貪曾被追問可能快將被檢控時，更在G4警員護送下快閃離開，前後到場只有十幾分鐘。最搞笑係，G4竟將貪曾帶到一個通往酒店廚房嘅門口離開，莫非冥冥中注定貪曾將要「落鑊」？
途經廚房「鑊」味濃
多個商會尋日在港島香格里拉酒店舉辦十‧一酒會，嘉賓之一的貪曾等到儀式開始前一刻才到場。佢一入場就行上台，起初與站在他右手邊嘅袁國強只相隔一位嘉賓。其後財政司司長曾俊華亦到場，袁國強立即拉住曾俊華站在其左方，明顯想與貪曾「企遠啲」。到祝酒環節，貪曾與特首梁振英及曾俊華等人碰杯，唯獨無行去袁國強嘅方向，相當避忌。
貪曾落台後，卓妮問佢三個月檢控限期將至，會否擔心被起訴？他嬉皮笑臉地拋下一句：「你真係好好笑！」後在G4護送下急步「走後門」離開。不過未知是預先準備、還是湊巧，貪曾所走的後門竟是通往酒店廚房嘅側門，狼狽之餘增添「鑊」味。
