「德不稱其任，其禍必酷；能不稱其位，其殃必大。」功夫茶引用古人嘅說話，唔係想拋書包，只係想指出庸官嘅禍害。好似人稱「廢鑊」嘅周一嶽咁吖，出任食物及衞生局局長嘅時候已經渾渾噩噩，翻閹出任平機會主席同樣添煩添亂。正如「東方報業民意調查」顯示，大部分受訪者認為周一鑊掌管平機會表現差劣，毫無表現，希望港府盡快送走瘟神。
嗱，周一鑊出掌平機會唔夠三年，無事生非，爭議多多，特別係建議就「族內歧視」、異性及同性「事實婚姻」立法等等，更加被法律界質疑越權，令本來已經高度分化嘅社會進一步撕裂。唔怪得大部分受訪者批評周一鑊人如其名，渾渾噩噩，加上本身欠缺平機會經驗，咪搞到亂象叢生囉。
欠缺經驗都算嘞，周一鑊上任後櫈都未坐暖，就攤大手板向港府攞錢，一時話要「升呢」搬去更豪華嘅辦公室，一時又話自己「職務繁重」要擴充編制，加人加位，直頭當納稅人係提款機。最離譜嘅係，平機會疊床架屋，面對外界質疑嘅時候，佢冇反省不特止，反而建議聘請顧問檢討，唔使問阿貴，呢筆顧問費又係公帑埋單，你話佢係咪同納稅人倒米吖？上述調查顯示，四成受訪者狠批平機會大花筒，浪費公帑；三成四人直斥平機會如無王管。
呢啲咪就係民意囉。大家有眼見，自從周一鑊上場後，平機會內部管理混亂，導致職員大量流失，尤其係解僱曾鼓勵教友反對性傾向歧視立法嘅總平等機會主任束健銘，更被指涉及信仰歧視同打壓異己，搞到要對簿公堂，都唔知點樣收科。
冇法子喇，平機會士氣低落，軍心渙散，又點會有好表現吖。私隱專員公署早前做咗個調查，了解廉政公署、私隱公署、消委會、警務處、申訴專員公署及平機會等六個執法及法定機構處理投訴嘅可信度，結果平機會成為包尾大幡，簡直丟架。正如有人踢爆，平機會接到市民投訴後往往闊佬懶理，關人個關，投訴人想約見調查人員仲難過登天，公信力唔低至奇喇。
所以話，多隻香爐多隻鬼，平機會成立十九年，總共有七任主席，個個都係醜聞纏身，唔係用人唯親，就係大花筒，咁嘅政治花瓶唔要好過喇。正如大部分受訪者批評，唔少過氣高官即使表現不佳，仍獲委任掌管公營機構，反映呢類政治花瓶已經淪為退休高官俱樂部。
所以話，禍福無門，唯人自招。港府有眼無珠，一味益自己友，連周一鑊呢舊廢舊電池都當係寶，又點可能唔施政混亂、烏龍百出吖！