柏拉圖《理想國》說：公正即強者的利益，此原則放之四海而皆準。對於無王管的民航處，公正即以權謀私者的利益，此原則放之禁區而皆準！
過去兩年，多次被本報踢爆大花筒及管理不善嘅民航處，日前又爆出該處高級職員涉濫權——為送個女去英國倫敦讀書，安排妻子使用「緊急通行證」進入禁區，一家三口更於禁區內「歎茶」享家庭樂，事件最終驚動警員。
阿哥，進入機場禁區範圍嘅「緊急通行證」乜用來咁用嘅咩？送個女去外國讀書都要搞張緊急通行證，若然有另一個高級職員，同個情婦Say Good-bye，又需唔需要申請張緊急通行證，在禁區前吻別擁抱，再來張自拍，才揮一揮手，見證不帶走赤鱲角上空一片烏雲？
據悉俗稱「ＣＡ證」嘅機場禁區緊急通行證，因涉及機場保安和飛行安全，需由處長級人員批出，呢位送女上機嘅高級職員，竟可以出示「ＣＡ證」，難怪被疑有高層在事件中有包庇，若然，如此漠視規管及機場安全，罪加一等！
有律師就話涉事民航處職員若於休班時，擅用機管局發出嘅通行證進入機場禁區，已觸犯非法進入機場禁區嘅罪名。事實上，相關通行證只供公務使用，任何人擅取用作私人用途都是違法。
好明顯，為了送個女去外國讀書而撻朵，擺明以權謀私啦！
最近兩年來，民航處濫權事件多籮籮，本報揭發民航處總部變身「大浴場」、「卡拉ＯＫ貴賓房」、「電視城」，極盡奢華，審計署曾把其糊塗帳記錄在案，而立法會帳委會則予以「強烈譴責和痛斥」，新空管系統又搞到一鑊泡，一個機構爛成咁，政府仲唔出手清理門戶？仲側側膊，唔多覺等運到？香港沉淪，有迹可尋也。