政情：今日你上鏡：音樂會籌款扶老「展」愛心

香港醫學會慈善基金每年都會舉行慈善音樂會，而今年受惠機構係「長者安居協會」，籌得善款將會贊助有經濟困難嘅認知障礙症患者及有需要嘅長者，終身免費使用「隨身寶」平安鐘，希望提升長者生活質素，出街都唔怕盪失路。醫學會會長史泰祖醫生（Louis）尋日就同慈善基金主席周伯展醫生一齊出席記者會介紹今年嘅音樂會，周伯展仲講起自己熱愛彈鋼琴添。Louis話，醫學會將資助今次音樂會嘅全部行政及籌辦費用，估計超過十二萬元，籌得善款將會全數用到受助人身上。