近日零售市道疲弱，唔少商舖都叫苦連天，不斷諗計救亡，但似乎唔覺政府有咩救市招數。行政會議成員葉劉淑儀尋日就忍唔住話，香港唔應該好似個人遊年代咁，單靠內地送啲旅客來港，依家風光幾年後，好事變成壞事，引起社會摩擦，不歡迎內地旅客，令旅客減少，香港又開始驚。佢話，政府亦唔可以度度都起購物城，狠批「唔通真係飯來張口」？
葉劉話，新加坡唔會好似香港咁有個人遊幫助，要靠大量投資吸引旅客，又大讚獅城有遠見同危機感，唔會只係睇自己小小一塊田，反而態度進取，表現好過香港。佢話獅城除咗經營東盟市場之外，亦爭取同內地合作，不斷加大投資額，又會做海外考察，搶其他地區生意，認為香港應該跟住國家嘅一帶一路走出去。
香港咁多人才，點解唔搞啲新嘢？葉劉質疑，係咪應該搞購物城咁低增值，繼續去賣奶粉同洗頭水？加上機場北又打算起個購物城，批評香港唔應該度度都係購物城，「唔通真係飯來張口」？香港要努力啲至得。睇嚟葉太呢句「努力啲」，都係送畀財政司司長曾俊華同商務及經濟發展局局長蘇錦樑，諗下新計救市先得！