中環出更：無障礙旅遊助傷健者圓夢
旅行對好多傷殘人士來說，可能是一件遙不可及的事，國際華商觀光協會日前就募集咗二百名來自學界及旅遊界的義工，舉辦「旅遊無障礙，傷健同歡樂」活動，帶一百名傷殘人士及家屬同遊迪士尼樂園。活動召集人、康泰旅行社董事總經理黃進達（Jason）話，希望發掘更多無障礙旅遊路線，方便殘障人士及長者外遊。原來香港總商會總裁袁莎妮（Shirley），都對無障礙旅遊有深刻體驗。
當日Jason於園內帶領傷殘人士進行多項任務，包括於景點前合照、與賣氣球職員合照、收集樂園貼紙等，佢話好多殘障人士都熱衷旅遊，亦有能力照顧自己，但礙於唔同國家嘅設備與環境問題，難以如願。現時佢正研究無障礙旅遊於不同國家嘅可行性，暫時認為日本等地輔助設施不錯。香港傷健協會主席何永煊就話，發展無障礙旅遊，除咗豐富殘障人士生活外，對長者一樣有幫助。
袁莎妮帶兩老「郵」日本
出席嘅仲有旅遊業議會主席胡兆英、旅遊事務助理專員廖廣翔及萬通旅行社總經理羅詠詩（Anthea）。Anthea透露，早前同媽媽及婆婆去完黃山旅行，八十幾歲嘅婆婆上山行得仲快過佢，可見長者對旅遊興趣不減。而Shirley早幾日於總商會企業家講座上亦講起同長者旅遊嘅經驗，佢話爸爸因為年紀大要坐輪椅，搭飛機好唔方便，佢顧住照顧父母同時又睇唔到行李，所以早前就諗到一家人齊齊坐郵輪，其中兩日途經日本沖繩，剩餘嘅時間就可以輕輕鬆鬆在郵輪上玩。
卓妮