政情：模擬立會 學生「星」級演技
建造業議會同香港綠色建築議會尋日舉辦模擬立法會辯論，由四十五位中學生分別扮演議員、立法會主席同埋官員，辯論將綠建環評加入賣地條款。學生們表現都算唔錯，不過全場焦點就落喺飾演環境局局長嘅同學身上，事關佢「耍太極」非常出色，連真正嘅環境局局長黃錦星（星星）都忍唔住拎出手機影呢位扮演者添！
夠官腔 似足環局局長
尋日飾演議員嘅學生都算準備充足，而扮立法會主席嘅演員亦學得似模似樣，除咗指摘「議員」高舉示威標語阻擋視線，又會提醒「議員」發言毋須彎腰遷就咪高峰。個個表現都咁標青，但評判之一嘅立法會議員陳克勤就最欣賞模擬環境局局長嘅學生，事關佢講嘢夠晒官腔，入型入格，仲暗寸話扮演者嘅講稿係由星星提供喎！克勤又話，現時官員好似倒模一樣，唔夠驚喜，若果官員唔多加努力，遲早畀中學生追過咁話。