政情：首副人選 嚇到走晒

原有四申請者 亦傳怕孭鑊

港大校委會早前以首席副校長係另一副校長嘅直屬上司為由，提出「等埋首副」任命、再聽埋對方意見後，先再決定是否通過讓陳文敏升任副校長。有關決定惹來各界質疑，並間接觸發其後嘅衝擊校委會事件。之後又有人爆料指，首席副校長本來有四名申請人，但其中兩人已自行退出遴選，明顯係畀有關政治風波嚇怕。到咗上月底，校委會又話鑑於短期內無法任命到首席副校長，因此毋須再「等埋首副」，預計本月底嘅會議便可以就陳文敏問題作出決定。

消息透露，校委會之所以喺短期內都委任唔到首副，原因係餘下嗰兩名人選，原來亦已先後褪軚。至於四名人選嘅退選原因，泛民方面當然就指係同不滿校委會處事手法有關，質疑校委想將否決陳文敏任命嘅「黑鑊」卸畀首副，自然嚇退有關人選。

至於反對陳文敏任命嘅人，就歸咎泛民粗暴干預港大自主、學生及激進人士武力衝擊校委會，先係首副人選先後退選嘅主因。總之就繼續各說各話，互數不是。

倘陳文敏被叮 泛民擬覆核

由於校委會內親建制嘅人數佔優，泛民已就陳文敏任命打定輸數，並諗定下一步狙擊行動。其中一招係就校委會嘅處事程序，或者校方嘅佔中捐款醜聞調查報告結論提出司法覆核。其中港大法律學院副教授兼佔中發起人戴耀廷和陳文敏本人，都講過不排除親自就事件提出司法覆核，令校委會以至整個港大繼續不得安寧。喺咁政治化嘅環境下，相信稍為有學術地位及管理能力嘅人，都唔會好想出任港大管理層，剩番晒啲熱愛政治鬥爭嘅人繼續鬥餐死，港大喺未來幾年真係冇眼睇！