建制派早前已揚言要向泛民主派報復，要包攬立法會各委員會的正副主席位，但未搶到位，建制派內部就懷疑「分贓唔勻」而內訌。工聯會（工記）投訴民建聯（民記）想搶走房屋事務委員會主席個位，仲分分鐘唔會還番第二個主席位畀工記。不過，民記就反駁，呢個位之前係泛民坐開的，按道理建制派可以輪流擔任。建制派將於下月初開會講數，並作最後決定，屆時分分鐘嗌交。
今次爭位源於去年泛民「突襲」搶走工務小組及人事編制小組委員會的正副主席，之後建制派議員申請逾期加入亦遭阻撓，觸發建制派在新一年立法會期搶位報復。
據了解，幾年前協調好由泛民做主席的委員會，現時就有不少建制派虎視眈眈，例如房屋事務委員會，現時由工記麥美娟做主席，民記鍾樹根做副主席，但近日就傳出民記希望一人做一年主席，新一年應該由鍾樹根接任主席，結果引起工記不滿，揚言如果民記硬要搶位，建制派要讓出交通事務委員會主席之位予工記鄧家彪。
而本來協調由工黨李卓人做主席的公務員及資助機構員工事務委員會，建制派屬意由勞聯勞工界議員潘兆平繼續做主席，但同時工記亦有意派郭偉強爭奪主席之位。以上幾個主席位都涉及公屋、民生及基層公務員的權益，同選票有極大關係，自然爭崩頭。