政情：電騙中招 王國潼復出「爆棚」
國寶級二胡大師王國潼夫婦早前墮電話騙案，有指損失二千萬元。上周六王國潼就同有「二胡王子」之稱嘅兒子王憓（Ray）父子檔出騷，今次係王國潼受騙後第一次公開演出，當晚幾乎全場爆滿，氣氛唔錯，睇嚟樂迷都好支持王國潼父子。
王國潼與Ray上周五晚喺高山劇場為由康樂及文化署主辦嘅《紀念劉天華誕辰一百二十周年音樂會》演出，兩父子仲為樂迷簽名，有唔少樂迷排晒隊等候攞佢哋嘅簽名，真係捧場，而王國潼嘅心情似乎亦已經平復咗。
稱最緊要阿仔喺身邊
Ray就話，其實事隔近一個月，父母情緒已經平復落嚟，依家已經過番正常生活。Ray仲透露，爸爸之前仲同佢講，件事發生咗唔緊要，最緊要係有阿仔喺身邊咁話。正所謂「錢財身外物」，有屋企人同樂迷嘅支持，相信王國潼夫婦都可以安然面對事件。