水能載舟，亦能覆舟；水能生財，亦能生災。好似鉛水咁，搞到滿城風雨，人心惶惶，呢啲就係所謂嘅禍水喇。最令人估唔到嘅係，鉛水風波除咗令市民冇啖好飲，而且令港府見財化水添。
話說本港水費二十年未調整過，港府去年開始放風要加水費一成，原本打算今年實行，點知一場突如其來嘅鉛水風波殺到當局措手不及，被迫放棄加水費計劃。消息人士係咁講嘅，唔單止今年唔會加水費，未來幾年亦唔會重提。咁都唔止吖，政府畀政黨圍攻，要求對受影響屋邨減水費「贖罪」，隨時加水費不成，反而搞到庫房出血，你話係咪見財化水吖？
禍福無門，惟人自招。現時水費大約平均每戶四十七元，庫房每年補貼十億元，港府一直想加費追回成本，審計署今年初亦提出建議，家陣卻因鉛水醜聞而泡湯，呢啲咪叫自己攞嚟衰囉。當局急急凍結收費，表面睇好似主動補鑊，其實係無可奈何嘅咋，老實講，鉛水事件揭露監管制度千瘡百孔，當局淪為箭靶，如果喺呢個時候加水費，實火上加油激起民憤，就算港產官僚夠厚面皮提出，立法會都唔會開綠燈，咪焗住自動投降囉。
至於減水費咯喎，大家都知區議會選舉臨近，政黨為咗選舉攞票，獅子開大口唔出奇，不過咁喎，建議涉及公帑補貼，對納稅人係咪公平呢？其實正如有人話齋，水費只係有限數目，並非居民最關心嘅事情，反而更關心何時恢復安全食水供應，如果鉛水危機遲遲冇辦法解決，莫講話減水費，就算免費都冇意義喇。
話時話，鉛水風波至今超過兩個月，幾時至能平息呢？大家有眼睇，當局一味頭痛醫頭，好似盲頭烏蠅亂咁撞，方寸大亂。呢，隨着風波不斷擴大，除咗為公屋同學校驗水，以及補助購買濾水器，當局亦打算為公立醫院驗水，話將○五年後落成、有六歲以下兒童入住及住院時間較長的醫療設施列為優先類別喎。問題係，其他政府建築物同私樓點算呢？市民幾時至唔使飲水思鉛吖？
其實，搵鉛兇話易唔易，話難唔難。本報早前獨家踢爆水管焊接物料含鉛勁超標，而且通街有得賣，呢個咪係「鉛禍」所在囉。嗱，連水務署嘅專責小組組員都承認水管焊接物含鉛機會較大，加上部分工人未經焊接訓練即施工，導致含鉛焊料溶入水中，造成鉛水問題，當局仲唔快快做嘢！
一句講晒，鉛禍責任未釐清，凍結水費難息憤。再講喇，搵出真兇只係第一步，追究責任同換水喉至係最關鍵。鉛水問題再咁拖落去，民怨遲早爆煲嘅咋，到時點止要求減水費咁簡單！