政情：蔡加讚親戚墮越洋電騙
電話騙案手法層出不窮，就算平日有留意相關新聞，一個唔留神都係難免中招。「玩具大王」蔡志明兒子、喜運佳鐘錶主席蔡加讚（Karson）透露，有經常穿梭加拿大同內地嘅親戚，早前喺海外收到自稱係香港一間公司嘅電話，結果被人騙取約十萬港元。Karson分享呢件事係希望提醒身邊嘅人要小心，否則好容易造成金錢損失。
誤信中獎 先繳十萬元
話說Karson嘅親戚喺加拿大收到自稱來自香港一間公司嘅電話，話隨機抽到佢呢位親戚個名，並幸運地中咗獎金。不過，該公司職員隨即入正題，話收取獎金前要預先畀一筆錢，當係扣稅之類，仲話預先畀幾多錢就會收番幾多錢咁話。聽落去都幾吸引，佢呢位親戚不虞有詐，逐向呢間公司畀咗約十萬港元，結果都唔使多講嘞，呢個世界邊有咁大隻蛤乸隨街跳吖！