政情：霍泰輝笑談當年迎新營喪玩
近年大學迎新營成日都好似玩得好癲咁，但大學生玩得癲，原來唔係近年嘅事。中大副校長霍泰輝話，佢以前入讀港大嗰陣，都玩得好癲，只係嗰陣傳媒冇報道啫。
霍泰輝話，佢入港大嗰陣，就好似導演張婉婷執導的電影《玻璃之城》劇情咁，當年迎新營，就係一個戇居居嘅新生，有份跟住高年級一齊去打水戰、搶銅鑼，仲話其實年年都一定搶到個銅鑼嘅，一定會鬆章嘅。可惜佢讀醫科，二年級時好怕讀唔上被踢出校，讀書太忙，都冇時間帶新生再玩迎新營喇。不過，迎新營就令佢難忘咗四十幾年，至今都仲有同校友講起。
撐中大學生純品
霍泰輝仲話，張婉婷正正就是他同屆同學，七十年代一齊入港大讀書，當年他住利瑪竇宿舍，張婉婷就住何東夫人紀念堂。他強調，雖然當時玩得好癲，但風氣就好純情嘅，唔會玩不雅遊戲，相反依家啲學生，某啲遊戲就可能玩得過咗火，希望學生唔好咁做囉，但佢就撐依家中大學生都純品，唔會玩過火遊戲喎。