政情：「退休」五年 高鼎國專心湊仔
鐘錶零售業進入寒冬，業界無不頭痕點樣捱下去，但香港鐘表業總會前主席高鼎國（Geoffrey）就冇咁煩，因為佢決定「退休」五年。Geoffrey話，話咁快佢返家族公司幫手已逾十年，過去五年佢瞓身做社會公職及拓展生意，衝得太快、太癲，冇乜時間陪家人，所以要放慢腳步，回一回氣，休息五年後再戰都未遲喎！
仲會番公司 唔做工作狂
唔通Geoffrey趁市道淡靜想退下火線，將個燙手山芋掟畀細佬兼華明行副總裁高偉國（Tim）？Geoffrey笑笑口話唔係，雖然話「退休」，但其實佢仲會返公司，只係唔會好似以前咁癲。佢坦言，有此反思原來係因為一對六歲及九歲嘅寶貝兒子。
Geoffrey感慨話，過去幾年好少陪對寶貝仔，若再唔陪，囝囝好快就要出國讀書，會錯過陪佢哋成長嘅機會，依家得閒同阿仔踢吓波，不知幾開心。阿Tim就氣定神閒話，未來五年最緊要係打好根基，迎接下一個經濟景氣周期。