中環出更：宣揚客家功夫 趙式慶葉劉撞出火花
今年農曆大年初二，行政會議成員兼立法會議員葉劉淑儀於車公廟被舞麒麟撞飛的經典一幕，不單止令市民歷歷在目，更令大家得知原來舞麒麟同舞獅係有所分別。一直致力推廣及保護香港本土非物質文化遺產的地脈基金會創辦人趙式慶，尋日就透露邀請咗葉劉做客家功夫文化研究會榮譽主席，皆因連啲師傅之間一講起舞麒麟，都會不期然聯想到葉劉喎。
地脈基金會將於嚟緊中秋「迎月」前一晚，即九月二十五日，至十月中舉辦首屆「香港文化節」，透過一連串活動將傳統文化包括武術、舞獅、客家麒麟舞、道教音樂等文化融入年輕人生活之中。講起舞麒麟，趙式慶話類似葉劉被麒麟撞飛呢類事件，唔多唔少加深咗市民對傳統習俗嘅印象同認識，未嘗唔係一件好事。不過，佢哋今次冇特地邀請返當時撞飛葉劉嘅師傅演出，但就邀請咗葉劉做客家功夫文化研究會榮譽主席，對方仲一口應承添！
趙式慶又話，傳統文化唔應該淨係放喺博物館，保留嘅同時係需要一直活化，靠年輕人參與，先可以將傳統文化同周邊社會同步，所以今個中秋前後就搵咗好多學生一齊去接觸吓傳統習俗。去年底佢仲創立咗個服裝品牌，將武術原素加入時裝設計，希望改善呢類傳統形象。
謝曉瑩幫粵劇「返老還童」
卓妮同場仲見到中國國術龍獅總會主席江沛偉及靈宵劇團創辦人謝曉瑩。四歲就經常跟父母去睇粵劇嘅謝曉瑩現時會親自編寫新劇本，令粵劇內容年輕化。
佢又一改粵劇演出時間長短安排，吸納更廣觀眾群。現時佢成立嘅粵劇團內個個演員都非常年輕，年紀最大先三十五歲咋。
卓妮