政情：旅議會查薪短訊 惹電騙疑雲
本港又有疑似電話騙案出現？今次仲牽涉旅遊業議會（TIC）同工聯會立法會議員鄧家彪！本報收到讀者報料，話近日收到手機短訊，內容指TIC應鄧家彪議員嘅要求，進行一個有關旅行社領隊收入嘅調查，並叫人開啟自己個電郵填寫問卷。由於最近電騙手法層出不窮，旅議會做調查竟要擺個議員上枱，而且涉及自己嘅收入狀況，令人更加生疑，擔心一開電郵就會中招。
指應鄧家彪要求做民調
不過，旅議會總幹事董耀中接受我哋查詢時，證實有關短訊的確係由佢哋發出，並非電騙。至於點解要擺鄧家彪上枱，董耀中指對方早前同過旅遊事務專員開會，提出本港領隊收入不穩定，要求進行相關調查，旅議會諮詢私隱專員意見後，決定抽樣發短訊畀全港領隊，由佢哋自行決定是否回覆問卷。
有業界人士就指出，旅議會今次擺鄧家彪上枱，可能係為免被指益自己友。須知立法會選舉仲有一年就舉行，旅議會為領隊收入做民調，好容易會被人質疑想籠絡人心、曲線拉票，因此先要講清講楚係應他人要求進行調查。