香港係旅遊城市，旅遊巴逼爆本來係好事，代表客似雲來吖嘛，可惜嘅係，港府敷衍塞責，配套設施嚴重不足，搞到亂象叢生，烏煙瘴氣，好事都變成壞事喇。
嗱，本報記者喺暑假期間實地巡視灣仔金紫荊廣場、淺水灣海灘及土瓜灣崇安街等三個熱門旅遊景點，發現旅遊巴違反停車熄匙情況嚴重，短短半小時之內，就各有七至八架涉嫌違例，部分車輛就算空無一人，照樣開動引擎，不斷噴廢氣，途人淪為人肉吸塵機。其中淺水灣海灘淪為重災區，高峰期錄得嘅微細懸浮粒子足足超出世衞標準四十二倍，問你怕未。但奇怪嘅係，當局居然有法不依，執法不嚴，今年首半年針對違反停車熄匙條例嘅定額罰款通知書僅三十六宗，你話有冇阻嚇力吖。
點解旅遊巴變成墨魚陣呢？咪因為官僚失職囉。業界係咁講嘅，本港現時每日有多達三百至四百架旅遊巴喺街上行駛，但係泊位長期供不應求，尤其喺傳統旅遊熱點，更加係僧多粥少，司機唔敢駛離泊位，加上天時暑熱，咪惟有「焗」住違法，開住冷氣等客囉。所以話，部分旅遊巴無遵守停車熄匙條例，好多時係形勢所逼，如果當局做好自己份工，為旅遊景點提供足夠泊位，司機就唔使咁狼狽，市民亦唔使受罪喇。
當然，業界嘅處境雖然值得同情，但法例始終都要遵守嘅，汽車廢氣污染環境，人人都應該為改善空氣質素盡一分力。不如咁喇，如果司機真係谷到爆，不妨揸埋旅遊巴去「門常開」抗議，等班官僚試吓有氣無碇抖嘅滋味都好吖！
話時話，旅遊巴泊位不足，衍生嘅亂象點止呢啲吖。自從開放個人遊以嚟，內地團愈來愈多，逼爆尖沙咀同九龍城等不同旅遊熱點，但係旅遊巴泊位就十年如一日，咁多年嚟都無乜增加，搞到旅遊巴經常大排長龍，既阻塞交通，亦阻礙巴士上落客，簡直七國咁亂。尤其係尖沙咀近星光大道一帶，通街都係旅遊巴，巴士經常埋唔到站，乘客焗住要喺馬路中間落車，險象環生。仲有吖，由於泊位短缺，旅遊巴違泊成風，警方每年閒閒哋發出萬張牛肉乾，都咪話唔誇張。
講起唔知好嬲定好笑，最近旅遊業步入寒冬，內地遊客持續下跌，有人提出進一步開放個人遊城市，話要吸引「高端旅客」喎，之但係香港連最基本嘅旅遊巴泊位都搞唔掂，就算有高端旅客，都被香港嘅「低端配套」嚇走喇。
一句講晒，旅巴違規亂紛紛，泊位不足係禍根。港產官僚唔好再遊魂嘞，快快諗計改善旅遊配套，增加旅遊巴泊位，如果唔係，唔止藍天白雲愈叫愈走，連遊客都怕咗香港吖！