政情：盧文端撐女婿吳永嘉參選
福建社團聯會永遠名譽會長盧文端及兒子盧金榮（Wingco）平時各有各忙，好少喺社團活動上以「父子兵」隊形上陣。不過今年Wingco升任香港菁英會主席，盧文端即高調話要多啲支持個仔服務社會，早幾日仲叫埋女婿中華廠商聯合會副會長吳永嘉（Jimmy），一齊食吓飯幫Wingco打氣。
咁啱區議會選舉即將登場，盧文端所屬嘅政黨都走向年輕化，唔知佢會否支持個仔參選呢？盧文端諗咗幾秒鐘，笑答：「不如支持Jimmy選吖！」一句話即將個焦點轉移到盛傳會參選立法會嘅女婿身上，果然係政壇老手。冷不防接波嘅Jimmy梗係識笑唔識答。雖然外界早已盛傳Jimmy明年會爭廠商會立法會代表林大輝個位，但都冇理由咁早承認嘅！