政情：小島大平賣 葉振南唔吼
陷入財困嘅希臘前景未明，不過面向愛琴海嘅無敵靚景仍然吸引，早排有唔少島主割價求售。汕頭商會會長葉振南（Stephen）就曾經被好友撩佢買個島仔，一個七十萬呎島嶼叫價只係六百至七百萬港元，仲平過香港一般中小型住宅單位。
買咗個島都冇用
希臘大大細細島嶼多達二千多個，呢啲小島擁有權本來世代相傳，公開放售者少之又少。不過喺財政危機打擊下，當地政府開始徵收土地稅，迫使唔少島主賣島套現。Stephen話，佢做紅酒生意嘅拍檔係希臘人，熟晒地頭，早前提議佢趁平買個島玩吓。不過隔山買牛始終令Stephen唔多放心。佢話，喺當地生活都要識啲希臘文，況且個島荒蕪一片，又無配套設施，就算畀個島你玩晒都未必有用喎！