中環出更：龐朝輝傳戰渣甸山承母業

區議會委任制下屆將壽終正寢，有地區人士報料話，灣仔委任區議員龐朝輝近排頻頻喺渣甸山附近出沒，似乎有意為直選鋪路。如果佢真係落戶渣甸山選區，將會係區議會史上首次一家三口都曾喺同一選區參選。

本身係眼科醫生嘅龐朝輝生於醫護世家，佢媽媽係護士兼前灣仔區議員龐曹聖玉，爸爸就係牙醫龐可榮。○三年區議會選舉時，時任渣甸山選區區議員嘅龐太打算將議席讓畀丈夫，惟最終慘敗畀建築師陳耀輝，從此兩老就淡出政圈。但係龐朝輝就愈來愈活躍，仲傳出有意出選渣甸山選區添，唔知係咪打算為父母收復失地呢？

不過龐朝輝黨友就否認，佢話龐朝輝身兼醫生及校董，已分身不暇，而且佢志不在小選區，暫時無意參選喎。咁點解佢頻頻在渣甸山附近出沒呢？其黨友稱，自由黨青年團副主席林偉文兩三年前開始在渣甸山服務，龐朝輝作為師傅，不時陪徒弟落區亦理所當然。不過，龐朝輝未做過民選區議員，冇經過選舉洗禮，都算師傅？

卓妮