俗語話，能醫不自醫。醫生可以替其他人治病，但自己有病就經常束手無策，呢啲例子真係唔少o架。
話說三年前東區醫院有位醫生自殺，事後發現佢原來係愛滋病帶菌者，而且從未向醫院或上級申報。由於該名醫生曾喺外科部任職，參與過高風險手術，醫管局及衞生署焗住破天荒進行「回望調查」，安排一百三十名曾接受佢診治嘅病人測試愛滋病毒，雖然結果全部呈陰性反應，但「愛滋醫護」嘅曝光，唔止引起市民恐慌，亦令人關注病人嘅安全問題。
唔講唔知，一九九四年至今已有四十三名醫護人員呈報感染愛滋病，包括醫生、護士、牙醫等，而且可能只係冰山一角，因為當局並無強制要求申報，實際染病嘅醫護人員究竟有幾多，根本冇人知道。連醫生亦坦言愛滋醫護對病人有潛在風險，但基於私隱問題，好難強制醫護人員申報喎。
冇錯，醫護人員私隱當然要保護，問題係，病人安全及權益又點樣保障呢？正如學者話齋，醫護人員接觸血液嘅機會極高，當局冇強制佢哋申報係咪感染愛滋等傳染病，對病人毫無保障。
咪以為係危言聳聽吖，雖然本港暫時未有病人因接受愛滋醫護診治而受到感染啫，但外國最少已有四宗相關病例，涉及九名病人。好似美國佛羅里達州一名牙醫咁吖，一九八七年染上愛滋病後，再陸續將病毒傳染畀接受佢診治嘅六名病人，都咪話唔大鑊。事後美國當局立法規定，所有醫護人員必須進行愛滋病毒測試，確保病人安全。
反觀香港，到依家都冇規定醫護人員必須進行愛滋病毒測試，亦冇要求感染愛滋病嘅醫護人員主動向衞生署或所屬醫療機構申報，只係非強制性由主診醫生向專家組作不記名轉介，再由專家組決定受感染者係咪需要作出工作調動，或進行「病人回望」等事宜。而更大嘅漏洞係，醫護人員入職前話就話獲醫管局安排驗身，包括照肺及驗血等，但唔包括愛滋病毒測試，擺明係掛一漏萬喇。
仲有吖，即使醫護人員呈報感染愛滋病，當局亦以保密為由，拒絕公布佢哋嘅工作崗位。換句話講，病人對邊個係愛滋醫護一無所知，去公立醫院睇病只能自求多福。
講到呢度，好多人都有疑問，究竟係醫護人員嘅私隱重要，定係病人嘅安全重要？老實講，香港暫時未有病人受到愛滋醫護感染，純屬好彩，如果當局再唔諗辦法堵塞漏洞，遲早出事嘅咋！