梁實秋說：魯迅曾幻想吐半口血，扶兩個丫環到階前看秋海棠，以為那是雅事。其實天下雅事多的是，惟有生病不能算雅事吧？
一個人病到「吐血」，有靚丫環扶，相信睇乜都感覺唔到「雅」，有的，恐怕只是內心的淒苦，至為盼望的，唔係睇秋海棠，而係有幸遇到華佗再世嘅名醫！之不過，香港公共醫療經常發生離奇事故，甚麼斷錯症、割錯肺、配錯藥、輸錯血……想遇名醫？發夢冇咁早！
如今，本報調查發現：原來自一九九四年起，至今共有四十三名醫護人員，包括醫生、護士、牙醫等，呈報感染愛滋病，由於當局並無強制要求醫護人員申報，實際染病嘅醫護人員數量隨時更多。
地球很危險，原來係真㗎！唔好話老朽歧視愛滋醫護人員，本港雖然至今暫未有病人因接受愛滋醫護診治而感染愛滋病，但唔怕一萬，最怕萬一，中六合彩頭獎就話啫，萬一因輸血、拔牙或做手術而不幸偏偏遇上，點都係令人「抱恨終生」！
嗱！美國就曾經有一名愛滋牙醫為病人拔牙及整牙時，不慎將愛滋病傳染給六名病人，事發後美國國會規定所有醫護人員，必須進行ＨＩＶ測試，以確保病人安全。
本港雖然未有此類個案，不過，已知有四十三名醫護人員感染愛滋，相信政府有關部門都係時候做啲嘢啦，除了安排有關愛滋醫護從事另類崗位。（相信冇病人鍾意畀佢哋睇病或抽血吧？）
此外，醫管局亦好應該強制所有醫護人員測試ＨＩＶ，以保障病人福利及權益。
唔好郁吓就祭出「私隱條例」，一本通書千祈咪讀到老，政府再唔正視醫護愛滋問題，等到出事，又再來一輪調查、煞有介事成立獨立小組，做完大龍鳳，亦恐怕恨錯難返！