中環出更：落鑊在即 貪曾寸嘴死撐
捲入連串貪腐醜聞的「貪曾」前特首曾蔭權爵士「落鑊」在即，唔單止厚顏赴京參加尋日在北京舉行嘅紀念抗戰勝利七十周年閱兵儀式，尋晚面對傳媒追問擔唔擔心會被起訴時，竟然強顏歡笑扮鎮定兼寸嘴話「哈哈，又係呢句呀？」貪曾因為「貪盡海陸空、歎盡省港澳」等連串貪腐醜聞而被廉政公署調查超過三年，刑事檢控專員楊家雄早前仲話會即將就貪曾案作檢控決定，如果唔問起訴嘅事，咁問乜呢？都可以問佢瞓覺半夜有冇發惡夢扎醒嘅！
被問起訴 強顏歡笑
根據刑事檢控專員楊家雄六月下旬所講，三個月內會決定是否檢控貪曾，即係最遲今個月下旬就會有分曉。距離落鑊嘅日子愈來愈近，本來以為貪曾會疊埋心水留喺屋企等拉，點知佢竟然厚顏參加閱兵儀式。其實佢前日鬼祟出發去北京時，已經被記者問到驚唔驚隨時落鑊，當時佢心慌慌不惜撇低太太曾鮑笑薇，一支箭咁飆入去機場貴賓通道。後來抵達北京時再被問到相關問題，都只係得曾太答咗句「你哋擔心啫！」
封嘴兩日嘅貪曾尋日終於忍唔住回應，有報道指佢離開酒店去文藝晚會時，被問到擔唔擔心被起訴，佢強顏歡笑，仲寸嘴咁反問記者「又係呢句呀？」文藝晚會之後，有人報料話佢就同太太曾鮑笑薇去咗歎大會供應嘅消夜茶點，但似乎唔覺有人坐埋佢張枱，兩公婆似足孤獨老人，唔通啲人都怕咗貪曾？
卓妮