政情：自由黨貪多席 隨時清袋
區議會選舉未到，但好多政黨已經諗定明年立法會選舉，希望議席搶得幾多得幾多，特別係只得一個直選議席嘅政黨更加對議席「發晒茅」。除民協想突破一個議席外，據聞自由黨亦想挽回昔日兩個議席嘅光輝。政界一直有傳，自由黨田北俊（田少）會由新界東空降港島區參選，而該黨主席鍾國斌則由紡織及製衣界轉戰新界東直選補位。不過，最近又傳該黨前議員劉健儀重出江湖參選新界東，如此調來調去，唔好彩分分鐘一鋪清袋，貪字得個貧！
靠抽水難搶萬票
自由黨想爭多個直選議席，野心路人皆見，由田少不斷抽水，到鍾國斌近日言論突然惹火，都知該黨想以攻擊建制派嘅手段，爭取更多選民支持，而政界一直有傳該黨策略係「調區多一席」。該黨內部估計，今年區議會選舉，港島區有機會贏多一、兩席，如果明年立法會選舉由田少空降港島區，加上名氣及支持度，估計有機會贏一席。
不過，該黨喺一二年立法會選舉，由劉健儀排頭位出戰港島區，只得一萬七千幾票，同最低票當選嘅工聯會王國興，相差成一萬票；加上明年立法會港島區議席「七變六」，難道單憑田少所謂嘅名氣，甚或坐電車「抽水」兩句，就可以搶到成萬幾票？
劉知名度不可靠
如果田少落實空降港島區，其新界東議席就要搵人頂替。該黨內部認為，鍾國斌今屆先選到紡織及製衣業界議員，需要同選民有所交代，好應該選多屆功能界別，所以唔會轉戰直選。至於劉健儀知名度較高，最適合頂替田少嘅新界東議席，黨內仍然極力游說劉健儀參選，但即使她肯空降新界東，計番知名度明顯低過田少好多，議席隨時拱手相讓給其他黨派。一減再減之下，想耍聰明、貪多席，好可能貪字得個貧，連僅有嘅一個直選議席都保唔到。
田少回應話，立法會選舉安排要留待十一月區議會選舉之後先有最後定案。至於如此調動，會否一個直選議席都保唔到，佢話要睇民調再作定論。問佢係咪有信心出戰港島區可以贏得議席？佢說「民調so far ok」。過分自信會否變成龜兔賽跑嘅翻版、輸得好慘呢？