中環出更:貪曾撇妻慌失失

捲入連串貪腐醜聞的「貪曾」前特首曾蔭權爵士「落鑊」在即,但仍厚顏參加今日在北京舉行的抗戰紀念七十周年閱兵儀式,尋日佢出發前往機場時都鬼祟過人,試圖聲東擊西擺脫記者,在離家中途轉車前往機場,而抵達機場貴賓通道入口時,貪曾更一支箭急步衝入貴賓通道,好似唔見得光咁。點知卓妮之後就見到律政司司長袁國強及終審法院首席法官馬道立先後步入機場貴賓室,上演一幕被司法、律政負責人從後狙擊!

記者追問 愈叫愈走

貪曾約於中午十二時半抵達機場外疑再度「玩嘢」,當時貪曾的座駕先於鄰近機場貴賓室的迴旋處停泊片刻,其後突然再駛前至貴賓通道入口處,貪曾此時才落車。記者隨即追問佢會否擔心隨時「落鑊」,以及與有份調查案件的廉政專員白韞六、可能下令控告他的袁國強、及可能審理或判決其案件的馬道立同團,會否因接觸而引發角色衝突,貪曾一概封嘴拒絕回應,只顧一支箭飆入貴賓通道。

現場所見,貪曾表現得不知所措,撇下太太曾鮑笑薇在後面,二人相距兩、三個身位,曾鮑笑薇其後自行走入機場貴賓通道,如此看來,未知是否與袁國強及馬道立二人隨後步入機場貴賓室有關,莫非被人從後追擊因此慌失失?貪曾夫婦抵達北京後,被問到會否擔心被檢控,貪曾不發一言,但曾太就拋出一句:「你哋擔心啫!」

同樣捲入貪腐醜聞的「貪湯」前廉政專員湯顯明,昨午亦循機場貴賓通道搭乘航班赴京,貪湯全程狀作輕鬆「笑騎騎」,惟與貪曾一樣沒有回應記者的任何提問。此外,現任廉政專員白韞六已提早於前日赴京。

卓妮

第一手消息請下載on.cc東網iPhone/iPad/Android/Windows Phone Apps