近年來，喺激進組織「鳩嗚」及「光復」之下，香港由「好客之都」淪為「趕客之都」，旅遊業進入寒冬，叫苦連天。不過咁，世事無絕對，旅客唔上門啫，仲有好多人將香港視為天堂。乜嘢人？咪就係嗰啲源源不絕嘅假難民囉。
唔係誇張，自從香港九二年加入聯合國《禁止酷刑公約》後，港府大開中門，來自東南亞及非洲等地嘅所謂「難民」愈來愈多，搞到香港七國咁亂。雖然當局去年起設立統一審核機制，加快甄別程序，可惜事與願違，酷刑聲請累積個案不減反增，家陣已經突破一萬大關，每個月平均增加幾百宗，都咪話唔大鑊。正如「東方報業民意調查」顯示，超過九成受訪者擔心假難民問題日益惡化，香港隨時淪為難民港。
係人都知，嚟香港尋求所謂政治庇護嘅酷刑聲請人士，九成九以上都係假難民，好似舊年咁吖，入境處審核嘅幾千宗免遣返聲請個案中，只有十幾宗成立。當局話就話簡化程序，加快審批，弊在你有張良計，佢有過牆梯，聲請人士利用各種手段拖得就拖，賴得就賴，有啲個案拖咗十年仲未解決。有人形容上訴機制已淪為假難民嘅「免遣金牌」，真係一啲都冇講錯。呢，上述民調顯示，三成六受訪者認為難民政策過時，三成五批評司法程序被濫用，兩成四不滿難民聲請變質。
難民政策過時，其中一個後果係帶來沉重嘅經濟負擔。假難民滯港期間嘅人道支援及法律援助等，全部由港府負責，隨着假難民不斷增加，相關開支亦節節上升，短短三年增加六成幾，今個財政年度去到六億多元。唔少聲請個案人未到，律師信先到，擺明有人發難民財，將公帑當提款機，你話納稅人係咪冤枉吖？
其實，浪費公帑仲係其次，假難民引發各種社會及治安問題先至大鑊。有啲假難民打黑工，有啲假難民作奸犯科，各適其適，無奇不有。好似蘭桂坊咁吖，近年烏煙瘴氣，罪案頻頻，幾乎淪為「人間妖域」，咪就係拜假難民所賜囉。警方數字顯示，今年上半年蘭桂坊嘅毒品案件比去年同期大增超過三倍，被捕者之中酷刑聲請人士佔咗七成。
講到底，假難民問題之所以尾大不掉，皆因港府假仁假義。家陣連歐洲國家都大幅收緊難民政策，唯獨香港中門大開，講都冇人信。上述民調顯示，多數受訪者認為應重新審視《禁止酷刑公約》，停止審批聲請，呢啲就係民意喇，港府收到未吖。正所謂，冇咁大個頭唔好戴咁大頂帽，今日香港問題多多，港府連自己都顧唔掂，仲要效婦人之仁，對假難民來者不拒，盞自食惡果嘅咋！