政情：公民講場：冇宣傳抗日周身「唔得掂」

今年係抗日戰爭勝利七十周年，內地嘅文宣攻勢可謂排山倒海，但香港有關當局嘅宣傳同紀念工作就薄弱得多。教育評議會副主席何漢權尋日就喺電台炮轟教育局，強調紀念抗戰勝利係宣揚反戰爭、促和平嘅價值，該局嘅德育及國民教育組應該有所行動。教育局局長吳克儉早兩日先至因就學校鉛水風波講錯嘢，畀全港教師同家長鬧爆，依家又因宣傳紀念抗戰不力而捱罵，呢舖真係「唔得掂」！睇嚟佢就算唔喺餘下兩年任期畀人炒魷，捱到二○一七年政府換屆時亦肯定冇得留低。