政情：孤寒財爺扮先知
本港股市最近跟隨外圍形勢急劇轉差而大起大落，股民飽食驚風散，財政司司長曾俊華（鬍鬚曾）喺最新網誌撰文就當自己一早有水晶球「扮先知」，話自己喺早幾篇網誌已經講過，各界預期美國加息週期一旦今年內啟動嘅一連串影響；佢其後疑再次為過去一直被狠批為「守財奴」解畫，自言香港經濟基調仍然保持穩定，原因之一係不論經常帳同財政預算案均有盈餘等，繼續自我感覺良好，一副你有你生活，我有我忙碌嘅樣子。
最近環球股市嘅大幅波動，唔少股民都損手爛腳，有苦自己知，鬍鬚曾於最新題為「再談風險」嘅網誌，無趁機安撫股民嘅忐忑不安情緒，相反就繼續「扮先知」，話自己於早幾篇網誌講過，各界均預期美國加息週期將會喺今年內啟動，美元將繼續保持強勢，因而有機會令一啲經濟基調較為薄弱嘅亞洲國家同新興市場，出現資金外流、貨幣貶值，以至資產價格大幅調整，影響全球金融穩定。
疑為預算案估錯數解畫
鬍鬚曾又列舉例子引證佢嘅說法，話唔少新興市場已出現明顯資金流走，匯率及股市亦陸續出現大幅調整等，不過問題亦隨之以來，到底係鬍鬚曾往績差勁，所以無人理佢嘅預言網誌，定係佢發出嘅預警唔到位，甚至唔夠震撼呢？
鬍鬚曾其後疑為一直被狠批為「守財奴」、財政預算案年年估錯數等解畫，佢於網誌提及，要評估一個經濟體面對風險時嘅承受能力，最重要係視乎本身經濟基調，如果經常帳同財政同時出現赤字，通常係一個經濟體基本面出現結構性問題、內外失衡嘅先兆。
稱下半年經濟增長較慢
對於香港今年下半年情況，鬍鬚曾估計，無可避免會繼續受到眾多外圍不明朗因素影響，包括美國加息步伐未明、歐洲同日本經濟未見復蘇，以及中國經濟下行壓力，加上須面對金融市場波動、外貿疲弱同旅遊業放緩等多項挑戰，經濟增長速度可能會較上半年為慢。
不過同一時間，佢認為大家毋須過份憂慮或悲觀，大讚本港經常帳同財政預算都有盈餘，經濟基調仍然保持良好，相信有足夠實力同經驗，應付可能出現嘅各種風浪，似乎想曲線為自己嘅理財哲學嘅面上「貼金」，莫非鬍鬚曾唔記得預算案盈餘年年滿瀉，仍然被批小恩小惠派糖嘅場面？