中環出更：「潮」男：家中女人話事
唔少人對於潮州男人有偏見，以為潮州人好大男人，要決定屋企所有嘅事，而潮州女人喺屋企就冇地位、冇聲出。不過，多個潮州男人包括潮屬社團總會（總會）會董陳光明（Johnny）、觀塘區議會主席陳振彬（Bunny）都話呢個講法係誤解，其實只係潮州女人識做，喺外面畀足面男人，實情係掌握晒屋企嘅所有話事權，仲叻過男人添！
最近總會搞咗多場盂蘭文化活動，總會會董胡炎松都出咗唔少力，而一眾「家己冷」亦踴躍捧場。講起潮州大男人，Johnny就以自己屋企為例話，其實只係佢媽媽喺外面畀足面爸爸，一返到屋企，無論家事或財政都係由媽媽作主。唔單止佢媽媽咁叻，連佢嫲嫲同婆婆都好顧家，男人娶到潮州女人就好喇！
娶到潮州女仔好幸福
Bunny都大讚娶到潮州女仔好幸福，仲自爆佢媽媽好注重潮州文化，喺屋企只會講潮州話，所以佢都識講潮州話。佢又話，潮州人雖然講嘢大聲少少，但係好重孝義，事事以長輩為先，做人又好有規矩。例如佢細個時屋企規定食飯時每樣餸都要食，筷子掂咗嗰舊餸就要食咗佢，雖然咁嚴厲，但係若佢做錯咗，父母都唔會當面斥責，只會事後先教喎！
總會常務會董劉文文亦印證話，佢爸爸絕對講唔上係大男人，因為爸爸主外，媽媽主內，屋企所有安排都係由媽媽決定，爸爸好少理。佢仲盛讚媽媽最叻之處，就係識得喺外面為爸爸留情面，所以潮州女人真係幾抵得諗。
卓妮