政情：劉仲恒 莊偉茵織愛心手繩
候任港鐵董事會主席馬時亨嘅女婿劉仲恒（Kevin）係慈善組織願望成真基金主席，最近佢接咗件好有挑戰性嘅任務，就係要短時間之內編織四百條手繩以作籌款之用。不過，點樣動員義工幫手織手繩又真係費煞思量，幸好Kevin人面廣，得到中電企業發展總裁莊偉茵（Quince）拔刀相助，得以順利完成使命。
動員百人助病童圓夢
話說Kevin早前接觸到一位患癌症病童Pansy，雖然Pansy身臥病榻，但係佢明白到世上有為數不少嘅小朋友，同樣受到病魔嘅折磨，亦唔似佢享受到香港高水準嘅醫療服務，所以希望編織手繩義賣籌款，協助內地嘅危疾病童。Kevin覺得Pansy年紀小小就識得推己及人，於是就一口答應實現對方嘅心願。
Quince得知Kevin急需一批義工，於是動員中電義工隊以及其家屬總共過百人，早前一齊喺Pansy帶領下，用咗半日時間完成目標。
其間Quince諗住自己識得紮辮，編織手繩應該有優勢，誰知織到一半，Kevin條手繩就大功告成。原來Kevin童年時都曾經學過織手繩，所以佢織得都算唔錯。