一班問責官員近日公布年度利益申報，除咗邊個係樓王惹人關注之外，我哋都留意到有啲得意嘢。例如民政事務局政治助理徐英偉（Caspar）新增一項利益，就係成為南華體育會嘅永遠會員。唔通佢為咗了解民政局管轄範圍內嘅康體設施，所以自掏腰包做會員？
Caspar笑笑口話，其實係為咗兩名鍾意游水同踢波嘅囝囝就真，加入做會員就可以善用南華嘅設施喇！睇番南華體育會網站，成為永遠會員只需一次過畀一千五百元，話貴就唔似高級會所咁貴，然後每次租場或參加興趣班都要另外畀錢。對於月入逾十萬元嘅Caspar嚟講，都算係小菜一碟喇！Caspar又話，老婆都會帶囝囝去康文署泳池游水，唔知佢哋又會唔會趁機監察吓場地乾唔乾淨呢？