政情：「鬼神」坐鎮 蕭嘉怡海報防介
唔少政黨會喺街上掛橫額、貼海報做宣傳，但好多宣傳品都難逃被惡意破壞嘅命運，有議員樣貌更被介至面容扭曲。中西區區議員蕭嘉怡（Kathy）就冇呢個煩惱，事關她有「猛人」相助。究竟邊個猛人咁「把炮」呢？
話說Kathy所屬嘅東華選區內有唔少棺材舖，有棺材舖老闆主動建議Kathy將海報貼喺店外，果然搞破壞嘅人驚招惹啲「污糟嘢」，所以都無再破壞Kathy嘅海報。咁啱現時為農曆七月，鬼門大開，Kathy真係唔驚？Kathy就笑稱，冇做虧心事，所以唔怕喎！
除咗棺材舖，區內問米神婆亦邀請Kathy將海報張貼喺其舖位捲閘外。有一次有狂徒有眼不識泰山，打介爛海報。起初神婆喺舖內工作聽到捲閘「呯呯嘭嘭」，心諗唔通真係咁猛鬼？細心一聽，其實係有人「搞鬼」至真，於是追出閘外喊打狂徒，自此就再冇人敢搞佢張海報喇。