中環出更：田北辰向劉江華「認親認戚」
民政事務局局長劉江華上任以來頻頻出席大小活動，政黨出身嘅佢最近亦忙於會見不同黨派，相信係想同各黨派打好關係。尋日有政黨嘅地區辦事處開幕，並邀請咗劉江華擔任主禮嘉賓，係佢上任後首次參加嘅辦事處開幕活動。主人家之一嘅新民黨立法會議員田北辰（田二少）致詞時大爆同對方有「親戚」關係。事緣劉江華創立嘅公民力量去年同新民黨結盟。咁都可以乘機攀關係，田二少真係好識得打蛇隨棍上。
局長隨即笠高帽
劉江華見田二少咁畀面，隨即好識做向對方笠番頂高帽，話無論係立法會定地區工作，新民黨都係良好嘅合作夥伴，希望未來可以繼續保持呢個關係喎！
講番呢個辦事處其實係為該黨社區發展主任甘文鋒而開。田二少話，好多街坊投訴好難搵阿鋒，今次開辦事處係回應市民訴求，仲話阿鋒一星期七日都要喺辦事處喎！阿鋒就話，佢一直住喺九龍區，最初連元朗、屯門都分唔清，做地區工作由一張枱、一個易拉架開始，派傳單嘅時候亦冇人肯接，好彩依家同街坊熟絡咗咁話。
卓妮