中環出更:莫話創業難

時下唔少年輕人未畢業就講創業,唔知創業之路難行。早前一班科技界名人出席一個活動時,自爆當年創業辛酸史。資訊科技界立法會議員莫乃光(Charles)話,當年曾經為員工出糧及交電話費而周圍撲水,創業其實辛苦過打工。有創業經驗嘅微軟香港及澳門總經理鄒作基亦有同感,仲話試過打工先知輕鬆過做老闆喎!

早前香港應用科技研究院推出創業學人計劃,為年輕科技創業家提供專業培訓、內地考察交流等,仲有基本生活津貼令參加者能夠無後顧之憂實現理想。

Charles即場分享當年做老闆嘅窘境,話嗰陣時創業資助少,所以好困難。話說佢年屆三十歲先開設一間互聯網供應商。期間試過要周圍撲水出糧畀伙記,又試過無錢交電話費,過千條電話線差啲被中止服務,真係窮到窿。好彩當年電訊市場引入競爭,電訊公司為咗留客而畀Charles延遲付款,先至捱過一關,難怪佢趁機大嘆有競爭係好事。經歷咗咁多難關,Charles盤生意最終賣咗盤,依家就全職做議員。佢感嘆話,創業絕對辛苦過打工,事關責任好重大喎!

廖家俊苦盡甘來助後進

微軟一哥鄒作基亦話,創業真係唔容易,佢做落先至發現打工仲輕鬆自在,所以最終放棄咗自己盤生意。

雖然創業不易,但都有成功案例。應科院首席市場總監廖家俊就係苦盡甘來嘅例子。佢話創業初期連交通費都負擔唔起,好彩最後公司成功上市,所以佢希望透過計劃幫年輕人一把。

卓妮

第一手消息請下載on.cc東網iPhone/iPad/Android/Windows Phone Apps