有人話，當今世界正處於和平年代，繁榮程度達到前所未有嘅水平。其實，呢啲都係假象嘅咋，唔講天津驚天大爆炸呢類人禍慘劇吖，泰國曼谷爆發恐怖襲擊就係世局動盪嘅明證，冷血兇徒光天化日下喺鬧市逞兇，造成死傷枕藉，死者包括兩名到當地旅遊嘅港人，令人慨嘆世道兇險，人生無常。
對於呢場突如其來嘅恐襲，港府表面上反應迅速，即時派入境處及醫管局人員前往泰國協助港人，一洗過往歎慢板嘅官僚習氣。之不過咁，當局雖然反應夠快，但始終擺脫唔到拖泥帶水嘅陋習，只將曼谷旅遊警示提升至紅色，而唔係黑色，令人莫名其妙。
俗語有話，唔怕一萬，只怕萬一。旅遊業界為安全起見，即時取消本月所有泰國團，旅客唔需要好似昂坪纜車咁唔上唔落半天吊。不過從呢件事就睇到港府唔夠果斷，泰國局勢立立亂，特別係炸彈兇徒擺明想透過襲擊旅客摧毀泰國旅遊業及經濟，恐襲隨時陸續有嚟，港府唔肯發黑色警示，反而將責任推卸畀業界，簡直攞市民安全較飛。
前事不忘，後事之師。○八年泰國發生大規模騷亂，由於港府拖拖拉拉遲遲唔肯派出包機，結果間接害死一名香港旅客，唔通港府見到棺材都唔識流淚？最荒謬嘅係，早年突尼斯爆發騷亂，港府直頭連旅遊警示都慳番添，理由係本港旅遊警示只覆蓋六十個國家及地區，你話係咪食古不化吖？
所以話，面對動盪不安嘅時局，市民真係要自求多福。係人都知，美國反恐反咗十幾年，點知愈反愈恐，愈反愈亂，世間幾乎無一處淨土。中東及西方國家固然飽受恐怖組織嘅威脅，香港亦唔安全得幾多嘅咋，恐襲無疆界，香港未必唔會淪為恐怖分子目標。再講吖，隨着近年本港愈來愈政治化，部分年輕人思想偏激，行為暴戾，有人甚至狼到自製土製炸彈，都咪話唔恐怖。事實證明，香港絕非世外桃源，港府輕描淡寫，隨時害人害物。
一句講晒，君子不立危牆之下。泰國唔止係是非之地，而且危機四伏，市民避之則吉，無謂以身犯險，小心駛得萬年船吖嘛。值得一提嘅係，炸彈襲擊案發生後，居住曼谷嘅港人紛紛前往醫院協助救援，再次發揮港人守望相助嘅可貴精神。一般市民尚且心懷善德，以香港同胞嘅安危為念，港府高官係咪應該做多啲呢？