政情：驚雲不定 難擔大旗
啟晴邨嘅鉛水風波愈搞愈大鑊，最先揭發呢件事嘅民主黨（白鴿黨）立法會議員黃碧雲（一舊雲）無可否認係飲盡「頭啖湯」，領先建制派主要對手，有人笑言「一舊雲」終於升呢為「步驚雲」喇，仲覺得佢有望可以擔正白鴿黨大旗添！不過，近期一舊雲喺鉛水事件中似乎無以為繼，有黨友認為一舊雲改變唔到「暈吓暈吓」嘅作風，把握唔到早着先機嘅優勢，點知尋日仲搞到特首「暈暈哋」添！
撰文斥獨委會被寸
鉛水事件令一舊雲一炮而紅，佢早幾日就自恃揭發事件好叻，沖昏頭腦，竟然喺報章撰文批評政府獨立調查委員會獨立性不足，質疑特首會干預調查委員會嘅運作，搞到政府前日急急出稿反駁兼澄清，而特首梁振英尋日亦都特登回應一舊雲話：「聽到之後有啲暈暈哋」，仲話一舊雲嘅說法對調查委員會主席同委員都唔公道，仲話講呢番說話嘅人唔認識法例同規定添，擺明寸爆一舊雲無常識啦！
一舊雲唔單止經常對外失言，對內亦有白鴿黨員質疑佢能力不足。本來白鴿黨喺鉛水事件應該有絕大優勢，唔止跑贏建制派，亦都跑贏其他泛民黨派，有人認為呢個優勢可以帶落區議會選舉，令該黨增加勝算。點知一舊雲竟然同新民主同盟等其他泛民成立反鉛水大聯盟，將辛苦建立嘅優勢同其他黨派分享，令黨內對佢有啲微言，白鴿黨以後會否再重用佢將成為疑問。
議會投票曾撳錯掣
俗語話「玉不琢不成器」，但一舊雲睇怕真係「朽木不可雕」，白鴿黨多次想捧佢上位，佢都甩轆收場。好似二○一二年一舊雲第一次參與立法會選舉，就獲老鴿張文光排名單第二支持，當時就有風聲傳出，該黨希望交棒畀一舊雲接任主席。點知佢竟然喺議會投票撳錯掣，更因此被戲謔為「一舊雲」，先至擱置唔畀佢做主席。今次鉛水事件之後，又有風聲話，要畀一舊雲接任主席，可惜佢唔爭氣，真係點扶都無用。