港大校務委員會上月維持決定，押後討論港大學術、人事及資源副校長任命，引發學生佔領會場及禁錮校委事件，事後港大校友都分兩批發聲，一批表明不希望港大捲入政治漩渦，一批則再三要求盡快討論及任命港大副校長。不過，同樣身為港大校友嘅「民主阿婆」、香港2020召集人陳方安生可能老到退化，直到前日先去信港大畢業生議會，要求謹慎處理授權票，認真反應遲鈍。
港大畢業生議會下月一日舉行特別會議，其中一批校友組成嘅「支持十大院長聲明」校友組，及由教育界立法會議員葉建源等人組成嘅港大校友關注組分別發功爭取校友支持，各自收集授權票，前者呼籲校友支持通過十大院長聲明動議，後者要求港大校委會於三十日內確認物色委員會對港大副校長任命等動議。
正當兩批校友大鬥法之際，於港大校委會被佔領會場事件發生後從未發聲嘅民主阿婆，後知後覺到前日至寫信予港大畢業生議會，要求盡力確保授權票嘅真確性，避免出現重複授權。佢其後又稱，如果港大畢業生議會嘅自身資源，未能自行核對授權票有效性，就應該委託具信譽嘅核數師負責，並確認核實相關投票結果。
事實上，民主阿婆表達嘅立場，只提到要求謹慎處理授權票，未有交代自己支持邊一批校友動議，難免令人覺得佢立場「騎牆」，莫非佢另有特別暗示？
卓妮