中環出更：一身懷舊裝名人細訴當年情
時下興懷舊，回憶舊香港情懷，康文署古物古蹟辦事處日前就搞咗個「從線到衫」嘅專題座談，紡織及製衣界議員鍾國斌（Felix）、著名設計師鄧達智都有出席，講吓舊時嘅辛酸事，而「中電孖寶」企業發展總裁莊偉茵（Quince）同總裁潘偉賢，仲特登一身懷舊時裝話當年添！
着住七十年代打扮嘅Quince話，佢喺啟德附近長大，細個每日睇住飛機低飛，都好擔心啲飛機會跌落嚟。佢話當年住七層高嘅大廈，冇升降機，擔水就一定要行樓梯上樓，當年仲成日停電添，所以每家都必備蠟燭。佢又話，細個唔少得自製玩具，反觀時下年輕人物質豐富得多，可以透過互聯網知道世界各地嘅事。
潘偉賢被嘲「收購」老婆
至於潘偉賢就着番廿幾年前買嘅牛仔褲，雖然依家多咗個肚腩，褲頭有啲窄，但都仲着得落，仲大讚質地舒服添！講起用電，佢話以前有分「粗電」同「幼電」，收費相差三成，唔少人為咗慳錢，都會冒險改裝電路，仲搞到有好多事故發生。
潘偉賢仲提到，喺漁村年代，香港有好多間電力公司，就連大嶼山同長洲等離島地區，都各自有公司供電，不過成本就好高喇，加上當年用高污染嘅燃料產電，後來中電收購咗之後，成本就平番啲。講開又講，潘偉賢太太都係長洲人，於是被人笑佢係「收購」太太返嚟嘅！
Felix就話，以前香港住喺木屋區同板間房都係常見嘅事，煮食會用火水爐，制水時又成日大叫「樓下閂水喉」，連佢自己都住過板間房，覺得時下年輕人非常幸福。
鄧達智就話，香港上一代好多都係從事工業，例如爸爸做裁縫，媽媽就做女工，但多數唔想仔女行番自己條辛苦路，加上教育制度改善咗，年輕人學識多咗，令到入行人數大減，令香港工業冇咗生命力。佢又話，香港以前人情味重啲，打工仔冇話計較要超時工作，但依家就唔係咁喇。
卓妮