政情：盡攬讀醫狀元 港大又勝一仗

陳家亮反駁 話有人誤會咗

早前中大醫學院推出「跳級制」引發爭議，梁卓偉仲公開質疑容許學生跳級係「走捷徑」，有違三三四學制原意，仲形容為「相煎何太急」添。其後陳家亮就透過社交網站反駁，強調中大提出的「跳級制」完全符合國際標準，不存在「走捷徑」及「濃縮版」課程問題，聲言有人誤會咗佢嘅建議，感到嘆息喎。雖然兩人只是隔空過招，但已令中大嘅如意算盤喺今年打唔響，在沒有跳級情況下，中大醫學院自然吸引力大減。

一如所料，在最新的大學聯招放榜中，十一名應屆狀元全歸港大吸納，有七人選擇入讀港大醫學院，搶盡風頭，而中大醫學院當然係拍晒烏蠅啦，至於收生成績最高依然為環球醫學領袖培訓專修課程。中大醫學院吸納尖子計劃失敗，嚟緊又要面臨醫委會調查，「跳級制」能否重推，將取決於醫委會轄下教育及評審委員會嘅調查結果。據了解，委員會將審核中大醫學院提交的文件，查明去年課程審核有否提及「跳級制」，並與校長、院長等管理層會面，了解「跳級制」實際運作。

有中大人士分析，即使今次通過醫委會的審核，但因為中大醫學院早前推出「跳級制」時，備受社會各界爭議，負面聲音居多，已令校譽受損，故憂慮重推計劃亦會再受非議，認為院長要三思而後行，「唔搞好過」喎。不過，做醫生係經過考核先可以掛牌，係咪跳一年班就影響到學生將來考取專業資格呢？究竟有關方面對自己嘅考核制度冇信心吖？抑或驚被人搶晒啲尖子學生呢？