西貢北交匯處 隔涉人罕淪荒地

08年啟用 居民：無實用價值

「呢個交匯處咁多年淨喺見到用嚟泊小巴同的士，似停車場多過站頭，得假期先有兩架巴士做中途站，都聽過話會搬碼頭啲小巴線過嚟，等下海旁嗰邊冇咁逼，後尾都係冇郁過！」居於西貢的陳太稱，西貢北公共運輸交匯處已啟用多年，惟一直未見發揮過「實用價值」。陳太指交匯處落實興建前從未曾得悉運輸署作公眾諮詢，認為運輸署當年無視民意即草率動用公帑興建交匯處，有失職之嫌。

西貢北公共運輸交匯處工程費用約七百萬元，並於二○○八年啟用。運輸署發言人回應查詢時稱，交匯處在周末及假期為市民提供兩條巴士路線及兩條專線小巴的特別班次，同時設有兩個的士停車灣及一個一般上落客停車灣，以減少通往市中心主要道路的車流，亦減輕市中心的交通擠塞，例如福民路於星期日及假日出現的擠塞情況明顯得到改善。發言人又稱，西貢巴士總站和福民路公共小巴總站將因應市中心近海旁發展而需關閉，屆時該交匯處亦會提供替代設施。

多部小巴停泊於交匯處，儼如停車場。	方國珊	市民意見 吳太：「有聽過話將（碼頭）個巴士站、小巴站搬過去，但都冇搬過，依家就淨係畀人停車，我都唔知政府起嚟做咩，嘥晒啲資源！」

區內交通擠塞未見改善

不過，記者於八月初的假日實地視察，發現交匯處人迹罕至，未見有候車乘客，場內只泊有多部小巴及的士，未見如運輸署所指有兩條專線小巴有特別班次開出。記者當天傍晚再於西貢巴士總站乘搭巴士車，至福民路時仍然遇上交通擠塞，被困超過十五分鐘。

西貢區區議會交通及運輸委員會委員方國珊表示，小巴、的士業界代表及巴士公司均認為西貢北公共運輸交匯處位置過於「隔涉」，因而拒絕將總站搬遷，質疑運輸署當初諮詢嚴重不足。「起一個咁大嘅公共交匯處，好明顯有一定嘅投資，點都應該要有計劃，事實就係起好咗業界同居民都有咁大嘅反對同回響，明顯係當時嘅諮詢好有問題，搞到依家（交匯處）荒廢咗，呢個失誤好應該要同運輸署問責！」

記者：蘇敏婷