孟子教落︰「雖有天下易生之物也，一日暴之，十日寒之，未有能生者也。」意思即係，就算係最容易生長嘅植物，曬一日，凍十日，亦冇可能生長。種植物係咁，做其他嘢道理亦一樣，港府平時對環境衞生闊佬懶理，搞到烏煙瘴氣至做一場清潔騷，咪就係典型嘅一曝十寒囉。正如「東方報業民意調查」顯示，大部分市民直指短期清潔行動成效不大，治標不治本。
好似最新一輪全城清潔行動咁吖，港府大鑼大鼓，係威係勢，而且例牌又係由政務司司長掛帥，擺出一副高姿態，其實係人都知，港產官僚無非做吓樣嘅咋。有人踢爆當局一早派人洗定太平地，高官手中嘅掃把只係擺甫士影相嘅道具，真係幼稚。
話時話，呢啲清潔騷已經唔係第一次，市民早就見怪不怪。○三年沙士一次、○九年豬流感一次、一三年沙士十周年一次……最搞笑嘅係，做咗咁多次清潔騷，衞生情況唔單止冇改善，反而愈掃愈污糟，簡直係弄巧反拙。呢，早前有政黨公布全港七十多個衞生黑點，遍布港九新界，連郊野公園同海灘亦唔例外，梗有一個喺左近，都咪話唔得人驚。查實多數衞生黑點喺曾蔭權爵士擔任清潔大隊長嘅時候已經存在，十年人事幾番新，十年黑點一個樣，你話係咪匪夷所思吖。
冇計喇，港產官僚做嘢三分鐘熱度，次次都係有頭威冇尾陣。當年民政事務總署推出「社區清潔指數」，聲稱監控十八區嘅衞生情況，又話要喺各區衞生黑點安裝閉路電視，點知幾年後就冇晒聲氣，難怪每次清潔騷後又打回原形喇。聽聽市民點講，「東方報業民意調查」顯示，多數受訪者批評清潔行動流於表面，未能針對衞生黑點持續行動；亦有唔少市民質疑清潔行動雷聲大雨點小，淪為政治騷。
正所謂，一污俱污。香港表面光鮮，內裏污糟，蛇蟲鼠蟻為患，點止有衞生黑點咁簡單吖。尤其係鼠患，更加令人毛骨悚然，曾試過有外國女遊客喺中環鬧市畀老鼠咬，搞到香港臭名遠揚。唔少受訪者擔心社區環境惡劣，容易爆發疫症，唔係杞人憂天o架，當年沙士肆虐，就係因為社區藏污納垢，成為傳播惡菌嘅溫床，唔該港產官僚打醒十二分精神，唔好再渾渾噩噩，重蹈覆轍吖。
正如古人話齋︰一屋不掃，何以掃天下。港府開口埋口專注民生，其實清潔香港就係主要嘅民生之一，如果咁都做唔好，更加唔使旨意佢哋「適度有為」喇，係咪！