上東網，事無大小都一目了然。
有時，一些看似「小事」，對老朽而言，卻相當有刺激腎上腺作用，好似日前報道大埔區一間小學設立嘅「好學生守則」，其中一項係規定「同學間要說普通話」，如此這般的「守則」，認真混帳兼混吉，咁即係暗示講廣東話嘅學生就不算是好學生，如此所謂「好學生守則」，老朽年紀大，副偈壞，都忍唔住要大喝幾聲：如此守則，聲大大，無貨賣！
講真，粵語係精密嘅語言，其語素豐富，聲母十九個，韻母五十三個，聲調一般有九個，嚴謹嘅粵語有十個（原本是九個調，即九聲，但陰平分裂為二，故此粵語有十聲）。十九世紀末，好多西方傳教士相信粵語不是方言，而是一種悠久的語言，粵語群可說是中國最大的言語共同體之一。
老朽從事語文教學工作逾三十年，向來反對以暴力扼殺粵語，普通話教中文可以，不過，何必要摧殘粵語這美麗的現存最古老漢語語種？
事實上，日常生活，師生見面，同學打招呼，用貼近香港生活的廣東話交談有何不可？何以就不是「好學生」？學生之間，在毫無語言造作和心理障礙之下，用粵語坦誠交流，除了更親切，亦更有效果。
試想想，若然有一位同學見到另一位同學搭火車，見到佢頭耷耷玩緊手機，眼見佢就快一隻腳差落個隙罅，若然遵守「好學生守則」，佢會話：阿牛哥，小心列車與月台之間的空隙啊！如果佢用廣東話，只要大喝一聲：牛！睇窿啊！說時遲，那時快，電光火石間就救咗阿牛免差錯腳而釀成悲劇！廣東話的日常語言簡潔醒神，同學間以粵語交流，才懂得「微妙平衡」，絕對係好學生！