前日喺北大嶼山醫院急症室外暈倒嘅梁姓男子，尋日不治死亡。由於醫護人員姍姍來遲，中暑男子被拖延廿分鐘先至送到急症室搶救。食物及衞生局局長高永文就死撐話，現場嘅保安員幾分鐘內已聯絡咗急症室嘅醫護人員，醫護人員又用咗幾分鐘準備急救工具。醫護人員準備出發冇耐，救護車又早一步到，於是就由救護車送去急症室，同事已經盡晒力喎！幾分鐘又幾分鐘，加加埋埋遲咗廿分鐘，性命攸關，都好似烏龜咁慢，仲話盡咗力？真係搵鬼信囉！
