中環出更：廳長鍾國試最愛梳化床
現時唔少人都鍾意上網訂購傢俬裝飾，但唔少政界人士仍選擇喺本港購買。香港傢俬裝飾廠商總會日前舉行六十周年晚宴，獲邀出席嘅商務及經濟發展局副局長梁敬國（Godfrey）一見到大會展覽嘅本地設計得獎傢俬作品，就即刻行埋去左睇右睇，仲忍唔住試坐添。同場嘅紡織及製衣界立法會議員鍾國斌（Felix）就話買傢俬要喺香港買至放心，又話最鍾意梳化床，因為萬一被太太趕出廳瞓都唔使咁辛苦喎。
梁敬國齋坐話冇錢
當晚Godfrey見到大會展覽嘅傢俬就一支箭走埋去左睇右睇。總會主席嚴志明（Eric）見佢咁有興致，就同佢介紹幾款多功能桌椅，雖然係展品，Godfrey都唔客氣試坐。卓妮見佢咁認真，問佢係咪好想買，點知佢就話冇錢喎！真係搞搞震，冇幫襯。
同場嘅Felix就話鍾意喺本地買傢俬，因為質素有保證，就算貴啲，但一用十幾年都抵番晒。好似佢屋企張大床就瞓咗廿年都好實淨。講開選購傢俬，Felix最講究嘅係梳化，佢鍾意布梳化，一來可以清洗，二來睇厭咗圖案就可以「換畫」。最緊要係張梳化要連床，因為一旦激嬲太太要做「廳長」時，都叫做有張床瞓吓喎！
新上任嘅公務員事務局局長張雲正（Clement）都有出席，事關佢同Eric係大學同學。Clement話，佢哋十幾歲識到依家，所以一定要嚟支持。今次亦係Clement擔正局長後首個公開活動，真係畀足面老友喇！
卓妮