港府無能，拓地建屋寸步難行，導致房屋問題不斷惡化，除咗劏房遍地開花，連新界農地都出現僭建「鐵皮別墅」，好似攞正牌咁公然出租圖利，問你服未。
所謂嘅鐵皮別墅位於上水梧桐河農地，由一列樓高兩層嘅豪華鐵皮屋組成，共有十幾個單位，每個一百八十平方呎，廁所、廚房同冷氣機等設施一應俱全，加上臨河而建，環境清幽，真係成個豪宅咁款。但可惜吖，無論鐵皮別墅幾正都好，都係違法嘅。原來該地段屬於登記寮屋用途，業主擅自興建兩層高鐵皮屋，與原本登記尺寸不符，已涉嫌觸犯法例。而最匪夷所思嘅係，地政總署今年二月向業主發出警告信，點知鐵皮屋無拆除不特止，三個月後對開空地反而多咗另一座更大更豪嘅鐵皮別墅，佔地面積及單位數量均增大三倍，簡直當政府冇到。
鐵皮別墅明明違法，港產官僚居然聽之任之，仲有冇荒謬啲吖？尤其係新落成嘅鐵皮別墅「第二期」，更加連登記寮屋都唔係，擺明僭建，如果咁都可以過骨，仲成世界？即係咁，港府管治無方，權威蕩然，一向被市民當透明，呢個係眾所周知嘅事實，但無論點都好，打擊僭建係當局不可推卸嘅責任，地政官僚點可以對鐵皮別墅霸佔公地置之不理o架？正所謂，包容即係縱容。地政總署放軟手腳，等於縱容僭建，咁搞法，上水農地睇怕好快就會遍布鐵皮別墅，到時「十年建屋目標四十八萬間」變成「十年僭建目標四十八萬間」，連新界東北發展計劃都可以慳番添。
講嚟講去，呢啲都係房屋問題造成嘅惡果。新界農地淪為僭建樂園，固然因為當局成為無牙老虎，業主有恃無恐，但最根本嘅原因係房屋供應短缺，僭建出租有利可圖。以鐵皮別墅為例，一個百幾呎嘅豆腐膶單位，月租居然要五千二百蚊，呎租比區內豪宅有過之而無不及，業主點會唔「見僭開眼」吖。講到尾，有需求就有供應，只要港府一日拆解唔到房屋困局，無殼蝸牛望樓興嘆，僭建房屋就有價有市。講真吖，今時今日一屋難求，年輕單身一族更加望到頸都長，公屋輪唔到，私樓買唔起，連申請市建局資助房屋都被拒之門外，難怪有人講笑咁講，鐵皮別墅嘅業主可能唔覺得自己有錯，隨時仲認為自己幫緊港府紓緩房屋問題，掉轉頭要求頒個勳章畀佢哋添吖。
一句講晒，鐵皮別墅無王管，縮骨官僚助歪風。如果港府唔想香港淪為僭建天堂，唔該速速做嘢，除咗取締鐵皮別墅，仲要諗計加快增加房屋供應，唔好再渾渾噩噩吖！