政情：范國威想返立會打沙包
立法會行政管理委員會（行管會）早前開會，踢爆新民主同盟議員范國威（Gary）曾去信行管會，建議將屋企嘅沙包搬去議員專用健身室。事隔唔夠一個月，行管會向議員進行意見調查，徵詢議員對現有同新增設施嘅意見，包括增設座地式沙包、伸展訓練機及啞鈴。不過，最近多名議員被發現濫用工作津貼，狂印選舉宣傳品、狂買IT潮物，以至資助違法佔中行為，加上今屆立法會只剩下一年會期，如果呢啲器材唔啱下屆議員使用，恐怕又會白白浪費公帑。
儲物櫃或被「迫遷」
現時立法會五樓嘅議員活動室屬議員專用，室內設有由秘書處購買嘅健身器材，包括兩部跑步機、兩部健身單車、一部懸吊式滑步機及一部踏步機。此外，仲有兩部附有視像體育遊戲嘅電視機、兩張梳化及淋浴設施。而喺上月嘅行管會會議中，Gary建議議員活動室提供座地式沙包，又認為活動室儲物櫃嘅使用率偏低，提議移走儲物櫃，騰出空間放置更多健身器材。
議員活動室嘅使用率有幾高唔係好多人知，但既然講到室內嘅儲物櫃使用率偏低，即係活動室嘅使用率都唔會高得去邊。為咗了解議員屬意喺議員活動室設置邊啲設施，行管會決定進行意見調查，希望議員就議員活動室嘅設施提供意見。
問卷嘅問題包括使用現有設施嘅頻率，是否同意增設座地式沙包、伸展訓練機及啞鈴，以及對儲物櫃使用嘅意見。
范：自己畀錢買
我哋問過Gary，佢話由始至終都係話自費買座地式沙包，無要求使用公帑。即使依家有座地式沙包、伸展訓練機、啞鈴三個選擇，佢都係維持單一要求，即係買座地式沙包。佢又話，議員活動室嘅梳化同電視根本好少人用，可以考慮搬埋一邊，畀議員用健身器材。至於點解要打沙包，佢話呢項運動可以減肥排毒，加速新陳代謝。
講到尾，相信未必會有太多議員鍾意打沙包，即使Gary話自費買沙包，但都係佔用咗立法會空間做自己鍾意嘅運動。如果年屆七十九歲嘅議員劉皇發話要打麻將鍛煉手部同腦部記憶，咁係咪准佢自費放置麻將枱櫈喺活動室呢？