中環出更：「毛」事生非 議助大幅加薪無望
歷時七十九日嘅佔領行動影響深遠，除咗打殘香港嘅法治根基，連議員同議員助理要求增加津貼及薪酬嘅大計亦受拖累。立法會轄下委員會早於幾年前建議，將議員酬金與問責局長薪酬掛鈎，以及將議員助理薪酬與公務員薪級表掛鈎，其中前者好快就被強烈嘅民意反對下打殘，而後者則至今仍在爭取中。
不過，近日曝光嘅公民黨立法會議員毛孟靜（阿毛）涉嫌用立法會津貼購買佔中物資醜聞，以及多名泛民議員助理在「全職佔中」期間照用公帑支取全薪事件，變相將大幅調高議員助理薪津方案宣判死刑。最慘嘅係一批與佔中無關嘅建制派議員助理，無辜被泛民拖累，大幅加薪無望，自然埋怨阿毛累街坊。
何秀蘭被質疑剋扣助理人工
最搞笑嘅係，唯一有助理「瞓身」佔中、而自律地只向立法會申領一半議助薪酬津貼嘅工黨議員何秀蘭，竟被其他參與非法佔中嘅議助，質疑佢剋扣助理人工。何秀蘭要出稿澄清，指涉事助理人工其實並無減少，另一半薪酬最後係由工黨支付。眾所周知，壹傳媒集團前主席黎智英係工黨嘅最大金主，肥佬黎出錢資助違法佔中，因為今次事件而又多披露一例了。
卓妮