中環出更：宣港式奶茶 車水馬龍
港式奶茶係香港嘅地道文化，香港咖啡紅茶協會就搞咗個金茶王流動奶茶車活動，由尋日起一連五日出動流動奶茶車喺本港各區向市民免費派發港式奶茶。香港咖啡紅茶協會主席黃家和（Simon）就話，一杯好嘅奶茶一定要夠茶味夠濃，飲落去要夠滑，希望宣揚港式奶茶文化。
呢架流動奶茶車尋日就喺港島鰂魚涌向市民大派奶茶，仲有歷界「金茶王」沖奶茶比賽嘅得獎者即場表演。黃家和就話，因為屋企係做咖啡奶茶生意，所以一出世已經同奶茶結下不解之緣。佢又話，協會過去七年都喺香港推廣港式奶茶文化，好希望有一日港式奶茶可以成為非物質文化遺產，打入內地甚至海外市場。
周雯玲發現飲奶茶提神
中華廠商聯合會青委會名譽主席周雯玲（Irene）尋日都有捧場。Irene話，佢以前鍾意飲咖啡，但就怕攝取太多咖啡因會影響健康，所以已經戒咗咖啡一年，改飲感覺上好似少啲咖啡因嘅奶茶，點知愈飲愈上癮，每朝都係飲奶茶當早餐，發覺原來奶茶同咖啡一樣咁提神喎。其實奶茶同咖啡都有咖啡因，係咪奶茶會少啲就真係唔知喇。
至於屋企做茶葉生意嘅廠商會青委會副主席王詩雅（Celia）就話，鍾意飲奶茶多過咖啡，係因為奶茶冇咖啡嘅苦澀味。佢又透露十月將會考國際品茶師資格，但佢所「品」嘅就唔係奶茶，而係中國茶。佢就話，修讀品茶師課程一半係因為自小對茶有興趣，另一半都係為咗屋企生意而自我增值喎。
卓妮